Google trend 上榜，咁你明「港人港地」仲需唔需要啦。
『
網事力場：公屋潮文拍成短片
盧宛茵活現白鴿眼外母
外母見未來女婿題材歷久常新，加上香港獨特環境，拍成影片肯定引來共鳴。高登網近日有一篇名為《公屋．居屋．私樓》的潮文，引來網上熱話，近日潮文被改編拍成短片放上YouTube。短片引人入勝的地方不單是道出現實的殘酷，無樓香港人之苦，更吸引是「甘草版衞蘭」61歲盧宛茵傾情演出外母一角，近日她亦在彭浩翔的新作《香港仔》演楊千嬅母親。
茵姐在戲中演出可以用無懈可擊來形容，她隨着片中男主角、有線電視體育記者陳焜傑所住的地方，由公屋、居屋到私樓所做出的不同程度的白鴿眼，拿揑得非常準繩，那副嘴臉只有當年她的成名作《朱門怨》中的二少奶可比。
拍攝這條片的導演Ronnie及負責收音的阿聰表示，他們都從事傳媒工作，花了一日完成，Ronnie昨受訪時說：「睇咗高登篇潮文好有共鳴，有時諗到結婚擺酒要用錢的話都好灰，所以拍出嚟。原本構思搵葉德嫻同蕭芳芳，不過佢哋都半退休，最後透過舊同學搵到Madam盧（盧宛茵）。」他表示製作費連盧宛茵的車馬費，共花五位數字，當中一半費用由好友資助。至於戲中的場地是Ronnie自家位於將軍澳的居屋，更找來老父飾演盧宛茵的丈夫。而扮演陳焜傑女友的陳洛鈞，曾參加全港第七屆IT代言人比賽。
http://hk.apple.nextmedia.com/entertainment/art/20140404/18678580
』
『
改篇網絡潮文拍攝成短片的風氣愈來愈盛行，最近大熱作品要數，由盧宛茵主演的《公屋潮文》，此影片是改篇自高登潮文《女朋友帶你返屋企食飯》。內容講述，一名男朋友到女朋友家中作客，伯母得知乖女男友住公屋、居屋或私樓的不同住屋情況下，所作出的不同反應及男朋友得到的不同待遇。由於今次短片邀得廣大觀眾熟悉的Madam盧宛茵主演伯母一角，Madam的演技獲巴打絲打們擊節讚賞。
潮文中反映時下80後都要靠父母幫忙買樓，而作為一個「阿媽」的價值觀就會覺得，懶理你是那間大學畢業、創業、抑或現在的工作幾有前途都好，有樓在手才是最實際。早前香港首富長和系主席李嘉誠亦感嘆，政府現時期望樓價下跌，但社會不要認為20多歲的年輕人可以買到樓，社會才公道。
http://news.sina.com.hk/news/20140403/-2-3230698/1.html
』
『
《女朋友帶你返屋企食飯》是一篇潮文，又名「公屋潮文」，原作者為高登討論區會員「高登教父」。文章描述「見家長」時，伯母對未來女婿不同家底的反應。
說話係難入耳…不過係事實︰
（租人樓不論乜樓）女朋友帶你返屋企食飯…伯母問你住邊…我租人樓 ka…響深水埗呀…不過D租都好貴下業主又想加租…。冇辦法la想同佢過2人世界…家辛苦D。此時…伯母會話我有D唔舒服要入房先…你自便la…你就同女朋友大家眼望望…最終不歡而散……
（公屋 租）女朋友帶你返屋企食飯…伯母問你住邊…我住公屋 ka…天水圍…天耀村呀…不過就租…早年走寶冇買到…好後悔…呢成餐飯…你會有飯食…可能又有肉食下…不過成餐飯伯母唔會再有野問你…話之你乜大學畢業…食完飯…伯母會大聲叫…女 送客…
（公屋 買）女朋友帶你返屋企食飯…伯母問你住邊…我住公屋 ka…天水圍…天耀村呀…不過就買…早年老豆老母買落…都叫自己物業…算係咁la…呢餐飯…你會好開心…你會有飯食之餘又有雞胸食…伯母又會好欣賞你父母當年既決定…而且話題非常之廣…有講有笑…因為有樓…而且樓價升…話之你乜Seven大學畢業…食完飯…伯母仲會問你食唔食生果…走時仲會點點頭…
（居屋 買）女朋友帶你返屋企食飯…伯母問你住邊…我住居屋 ka…600呎到la…早年老豆老母買落…叫自己物業lor…算係咁la…好過住公屋…好過租人樓…遲D一定會換私樓…外母會話你有志氣又叻仔…因為你已有物業…唔係9 up 能換到私樓既機會係有…呢餐飯…你會好開心…你會有飯食之餘又有魚食…大家會有講有笑…走時外母會問你點解坐多陣…
（私樓 老豆老母買落）女朋友帶你返屋企食飯…伯母問你住邊…我住私樓 Ka…雖然響將軍澳…早年老豆老母買落…不過已經供完係自己物業…成餐飯…會好開心…好溫韾…你會好似多左個老母咁…伯母又會好欣賞你父母當年買樓既決定…呢餐飯…有飯食之餘又有雞脾食…而且講句野都可以大聲D而且笑容由心裡笑出…因為個女可以搵到個有樓……話之你有乜學位有乜沙紙…話之你老豆老母買落定自己買…樓契最緊要…走時外母會問你點解坐多陣…同女入房玩下電腦…
（私樓 自己買）女朋友帶你返屋企食飯…伯母問你住邊…我住私樓 Ka…雖然響將軍澳…幾年前樓價低果時自己買落…雖然要供…不過供完之後係自己物業…成餐飯…你會好開心…好溫韾…你會好似多左個老母咁…伯母又會好欣賞你幾年前樓買樓既決定…呢餐飯…有飯食之餘又有雞脾食…外母笑容由心裡笑出…因為個女可以搵到個有樓之剩又搵到個叻仔…話之你有乜學位有乜沙紙…有樓最緊要…走時外母會問你點解坐多陣…同女入房玩下電腦…』
http://evchk.wikia.com/wiki/%E5%A5%B3%E6%9C%8B%E5%8F%8B%E5%B8%B6%E4%BD%A0%E8%BF%94%E5%B1%8B%E4%BC%81%E9%A3%9F%E9%A3%AF
【網民hot talk】月入一萬如等死？ 高登仔盼公屋打救
早前高登討論區一篇「公屋潮文」（文章原名「女朋友帶你返屋企食飯」）引發熱話，其後更被拍成《公屋．居屋．私樓》短片上載YouTube。片中男主角因家住公屋，遭女友母親（盧宛茵飾）「白鴿眼」，引起不少港男港女共鳴。但話雖如此，在樓價居高不下的今天，能夠入住公屋，已是不少年輕人的終極願望。
高登討論區近日有網民發帖詢問各位巴絲打：「覺唔覺喺香港月入一萬班人真係同等死冇分別？」該篇文章惹來網民熱烈討論，有高登仔指香港「萬元戶」是新貧窮階層，除非有公屋打救，減輕居住問題負擔，否則前途無希望。另有高登仔更揚言辭工，再找一份低薪工作以便輪候公屋，希望藉此為生活帶來新希望。
發起討論的高登巴打「公民抗命」，以「呢班人」去形容月入一萬的港人，但他未有透露自己是否其中一分子。他稱該類人每天乘車時望到興建中或剛落成的公屋，都會悲痛萬分，「買樓你冇本事，公屋又唔輪到你排，每個月份糧俾屋租蠶食咗大半」。這類萬元戶已不指望買醫療保險或為退休儲錢，就算在「糧頭」食餐好，都擔心「糧尾」會手緊；而就算運氣好，在股票巿場多賺2,000元，「下個月業主已經一個唔該，加返你2,000蚊租」。
除「揞啞底」的苦處，更淒慘是，一旦向人透露月入一萬元時，即會遭人白眼，懷疑是年少時不努力讀書的結果，而想追女仔拍拖更是空想，「搵咁少仲學人溝女？」。該類萬元戶雖然有一份正職，但肯付出勞力工作的人變得好像有錯，「到底呢一班人對未來可以有咩打算？到未來可以抱有啲的咩希望？」
有網民對樓主發表的內容表示「很心酸」，不少人留言訴說低收入的苦況，「買一個電話都無咗三分一糧啦，加上一個星期同fd去蒲，一個月又用咗三分一，然後屋企又要上高登比網費，手機上4g又要錢......無㗎喇，淨係呢D娛樂費用都無晒份人工，人生就這樣完結」。
網民認為在香港月入萬元而要活得自在，唯一希望就是住公屋，「有個同事上咗公屋之後冇再呻過窮」，又指月入一萬有公屋住，比月入兩萬元而租樓者，能享有更優質的生活。
另有巴打更提出「喜訊」，指政府新修訂的公屋輪候冊中，2014/15年度的入息上限，已調高至10,179元，扣除5%強積金後，9,670元以下即可輪候公屋，月薪剛好一萬元的人士可重燃希望。不少網民稱誓要千方百計住公屋，而月入1.2萬的網民更揚言下月會辭職，找一份低於公屋入息限額的工作，然後立即排隊輪候，望有朝一天能成為「萬(貧)民景仰的公屋戶」。
高登網民點睇：
西洋賽雞：我都覺，除咗公屋，我真係睇唔到未來，所以要千方百計都要得到公屋。P.S. 搵得9700一個月嘅垃圾。
浩仁哥：我做唔明點解呢啲人唔出嚟暴動。
北京。熱：其實冇30K以上都係等死......我搵2XK都係溝唔到女，樓又買唔起。
喂，點Jack：睇到依個post真係好心酸。
畢少陣：10k公屋又一定好過20k租樓嘅。
改咩名好呀：本身住公屋，笑而不語。
港產山草藥：香港精神死晒。我想知李嘉誠如果後生60年，唔靠呃，可以靠咩起家。
http://hk.apple.nextmedia.com/realtime/news/20140428/52421873
No comments:
Post a Comment